دوْستوم ائشیتجه‌ک: کتاب
احوالی اوْلور خراب
چون‌کی بو بئچارانین
یادینا دوشور کباب!
*
دوْستوم، ماشینا میندی
کتاب ائوینده یئندی
یئددی ساعت آختاریب
تاپدی بیر «فالِ هندی»!
*
دوْستوم‌دا وار چوْخ هُنر
یاخشی کتاب بگه‌نر
دئیه‌ر: «کاش موْبول کیمی
بوندادا اوْلا فنر»!
*
دوْستوم عالّمه بنزه‌ر
گئدیب، بازاری گزه‌ر
جیلدی گؤیچه‌ک کتاب‌لار
آلیب، دئکورا دوزه‌ر!
*
دوْستوم باش اگمه‌ز پولا
دئیه‌ر «کتاب چوْخ اوْلا»
آنجاق صفحه‌سین آچماز
قوْرخار رنگی پوْزولا!
*
دوْستومون وار اوْیونو
سئوه‌رم حال- خویونو
ایسته‌سه کتاب آلسین
اؤلچه‌جک ان- بوْیونو!
*
دوْستوم، قهرمان دوْستوم!
سؤزومو اینان، دوستوم!
بو کتاب‌لار اوْلانماز
فاطی یا تومان، دوْستوم!
شعر طنز: حمید آرش آزاد